❦
Ishga shoshib ketaman doim,
Tong otgandan kunim botadi.
Dilda ajib shodlik muloyim,
Meni uyda onam kutadi.
Yigit kishi koʻchanikidir,
Turfa yumish qoʻlin tutadi.
Xoh erta-yu, xoh qoq kechqurun,
Meni uyda onam kutadi.
Kunim oʻtar shu xayol bilan,
Gohi sabr toshib ketadi.
Kelsam hamki ming malol bilan,
Meni uyda onam kutadi.
Koʻzin yoʻlda qaratib qoʻyib,
Ming bir xayol zahrin yutadi,
Kech qolsam-u sogʻinib kuyib,
Meni uyda onam kutadi.
Bekpo‘lat BAXTIYOR
“Jannatim-Onam”
she’riy to‘plamdan.
Bekpo'lat Baxtiyor
Shoir va jurnalist. She'riyat, jurnalistika va musiqa yo'nalishlarida ijod qiladi.